ចិន ត្រៀម ដើរ “តួនាទី ស្ថាបនា” ដើម្បីបញ្ចប់សង្គ្រាម អ៊ុយក្រែន

ចិន ត្រៀម ដើរ “តួនាទី ស្ថាបនា” ដើម្បីបញ្ចប់សង្គ្រាម អ៊ុយក្រែន

ចេញផ្សាយនៅថ្ងៃទី២ ខែមេសា ឆ្នាំ២០២៥៖

ចិន បានត្រៀមខ្លួនជាស្រេច ក្នុងការ ដើរតួនាទីស្ថាបនា ដើម្បីបិទបញ្ចប់សង្គ្រាមនៅអ៊ុយក្រែន ។ នេះ គឺជាសម្តីអះអាងរបស់លោក វ៉ាង យី ប្រមុខការទូតចិន ដែល កំពុងបំពេញទស្សនកិច្ចនៅទីក្រុងម៉ូស្គូ។ ក្នុងពេលជួបគ្នា ប្រមុខកាតទូតចិននិង រុស្ស៊ី បាន លើកអួតសរសើរ អំពីទំនាក់សហប្រតិបត្តិការ យ៉ាងស្អិតរមួត រវាងមហាមិត្តទាំង ២។ លោកពូទីនវិញ បានប្រាប់ លោកវ៉ាង យី ថា លោកសង្ឃឹមជួប លោកស៊ី ជីនពីង នៅខែ ឧសភា ។

លោក វ៉ាង យី ប្រមុខការទូតចិន បានធ្វើដំណើរទៅដល់ទីក្រុង ម៉ូស្គូ កាលពីថ្ងៃទី ១មេសា។ នៅម៉ូស្គូ លោក វ៉ាង យី បានផ្តល់បទសម្ភាសន៍ មួយ ឲ្យបណ្តាញ ព័ត៌មានរុស្ស៊ី Ria Novosti ដែលលោក បានអះអាងថា ចិន បានយកចិត្តទុកដាក់ស្តាប់ ហេតុផល និងការចង់បានរបស់ភាគី ទាំងអស់ ដែលមានចំណែកពាក់ព័ន្ធនៅក្នុងវិបត្តិសង្គ្រាមនៅអ៊ុយក្រែន។ លោកវ៉ាង យី បានគូសបញ្ជាក់ថា ចិនបានត្រៀមខ្លួនរួចជាស្រេច ដើម្បីដើរតួនាទី ស្ថាបនា ឈានទៅបញ្ចប់វិបត្តិសង្គ្រាមនៅអ៊ុយក្រែន ។

សូមបញ្ជាក់ថា នៅម៉ូស្គូ លោក វ៉ាង យី បានជួបជាមួយ លោកប្រមុខការទូតរុស្ស៊ី Sergueï Lavrov និ ងលោកពូទីន។ លោកវ៉ាង យី បាន ប្រកាសថា ចិងនឹងបន្តធ្វើការជាមួយរុស្ស៊ី ដើម្បី ចូលរួមកសាងសន្តិភាព។ លោកអះអាងទៀតថា ចំណងសហប្រតិបត្តិការចិន-រុស្ស៊ី នឹងប្រាកដជាកាន់តែរីកចំរើន ស្វាហាប់ ឈានចូលដំណាក់កាលថ្មីមួយទៀត។ លោក ពូទីន បាន លើកឡើងថា លោក សង្ឃឹមចាំជួបលោក ស៊ី ជីនពីង នៅខែឧសភាខាងមុខ ។

សូមរំលឹកថា ទំនាក់ទំនងរវាងចិននិងរុស្ស៊ី បានរីកធំធាត់ខ្លាំង ជាពិសេសក្រោយពេល ដែលរុស្ស៊ី បាន លើកទ័ពចូលឈ្លានពានអ៊ុយក្រែន កាលពីខែកុម្ភៈឆ្នាំ ២០២២។ ចិនមិនត្រឹមតែមិន បានប្រកាសថ្កោលទោសរុស្ស៊ីប៉ុណ្ណោះទេ តែចិនថែមទាំងបាន លួ ចលាក់ជួយទិញប្រេងរបស់រុស្ស៊ីថែមទៀតផង ។ យ៉ាងណាមិញ អ្នកវិភាគខ្លះ បានសំឡឹងឃើញថា ការដែលរដ្ឋបាលថ្មីរបស់លោកដូណាល់ ត្រាំ ព្យាយាម ខិតចូលចាប់ដៃជាមួយ រុស្ស៊ី គឺក្នុងគោលបំណង មួយ បំបែករុស្ស៊ីពីឥទ្ធិពលរបស់ចិន ។ តែយ៉ាងណា គេជឿថា លោក ពូទីន មិនទៅល្ងង់ឆោតទុកចិត្ត អាមេរិក ហើយ ដោះដៃចោលចិននោះឡើយ ។

ទាក់ទិននឹងវិបត្តិសង្គ្រាមអ៊ុយក្រែន ចិនតែងតែអះអាងជានិច្ច ថាខ្លួនជាប្រទេសអព្យាក្រិត មិនកាន់ជើងនរណាទាំងអស់ ហើយ ចិនក៏ មិនបាន ចូលរួម ជួយផ្តល់ជាអាវុធទៅឲ្យ ភាគីណាមួយដែរ។ ពោលគឺវាខុសពីសហរដ្ឋអាមេរិក និងក្រុមប្រទេសលោក ខាងលិច ដែល បានផ្តល់អាវុធជួយ អ៊ុយក្រែន ។

សំណួរសួរថា តើ ចិន អាចដើរតួនាទីអ្វីខ្លះ ដើម្បីបញ្ចប់សង្រ្គាម នៅអ៊ុយក្រែន? អ្នកវិភាគមួយចំនួនលើកឡើងថា សម្រាប់អ៊ុយក្រែន និង បណ្តាប្រទេសអឺរ៉ុប គឺ ចិនមិន អាចដើរតួនាទី ជាអាជ្ញាកណ្តាលបានទេ ព្រោះភាពលម្អៀតរបស់ចិនទៅខាងរុស្ស៊ី គឺគេឃើញច្បាស់នឹងភ្នែក ទៅហើយ។ ដូច្នេះ ចេតនាចង់នាំឲ្យ មានសន្តិភាព ដែលចិនបាន ប្រកូកប្រកាសនោះ វាអាចគ្រាន់តែជា សន្តិភាព ដែលរុស្ស៊ីជាអ្នក ដាក់លក្ខខណ្ឌគូសវាសតែប៉ុណ្ណោះ ទាំងដែល អ៊ុយក្រែន ដែលជាប្រទេសរងគ្រោះ ត្រូវចាញ់ប្រៀបទាំងស្រុង ប្រទេសត្រូវខ្ទេចខ្ទី ស្លាប់មនុស្ស និង ត្រូវបាត់បង់ទឹកដី ថែមទៀត ។

គួរបញ្ជាក់ដែរថា កាលពីពេលថ្មីៗនេះ លោក ពូទីនបានទាមទារថា លោក ហ្សេឡេនស្គីត្រូវតែចុះចេញពីអំណាច ហើយ ទុកប្រទេសអ៊ុយក្រែនឲ្យស្ថិតក្រោមការគ្រប់គ្រងបណ្តោះអាសន្នរបស់អង្គការសហប្រជាជាតិ។ បន្ទាប់មកទៀតត្រូវរៀបចំបោះឆ្នោត ទើបអាចចាប់ផ្តើមចរចាសន្តិភាពបាន ជាមួយរុស្ស៊ី ។ បើតាមន័យនេះ គឺ រុស្ស៊ី ចិន ហើយអាចមានអាមេរិកដែរ នឹងរួមគ្នា ជំរុញអនុវត្តលក្ខខណ្ឌនេះ នៅ ឯអង្គការសហប្រជាជាតិ ៕

Nº.0585