ក្រុមហ៊ុន Amazon បង្ហាញពីចំណាប់អារម្មណ៍ក្នុងការទិញយកកម្មវិធី TikTok នៅអាមេរិក
ចេញផ្សាយនៅថ្ងៃទី៣ ខែមេសា ឆ្នាំ២០២៥
សហរដ្ឋអាម៉េរិក៖ នៅពេលកម្មវិធី TikTok ខិតជិតដល់ថ្ងៃផុតកំណត់នៅថ្ងៃទី ៥ ខែមេសា ដើម្បីឈានដល់កិច្ចព្រមព្រៀងមួយ ដើម្បីស្វែងរកអ្នកទិញដែលមិនមែនជាជនជាតិចិន ដោយក្រុមហ៊ុន Amazon បានបង្ហាញពីចំណាប់អារម្មណ៍ក្នុងការទិញយកបណ្ដាញផ្សព្វផ្សាយដ៏មានប្រជាប្រិយភាពមួយនេះ ។
រដ្ឋាភិបាលអាម៉េរិក បានបញ្ជាក់ពីក្ដីព្រួយបារម្ភអំពីសុវត្ថិភាពដោយសារតែទំនាក់ទំនងរវាង TikTok និងរដ្ឋាភិបាលចិន ទោះបីជាក្រុមហ៊ុនបៃដាន (ByteDance) បានបដិសេធក៏ដោយ។ ខណៈនេះ មន្ត្រីអាម៉េរិក កំពុងប្រជុំគ្នា ដើម្បីពិភាក្សាអំពីជម្រើសផ្សេងៗសម្រាប់កម្មវិធី TikTok ដែលកំពុងតែប្រឈមនឹងហានិភ័យនៃការដែលត្រូវបានហាមឃាត់ ប្រសិនបើខ្លួនមិនស្វែងរកដំណោះស្រាយក្នុងការលក់កម្មវិធីទៅឱ្យអាជីវកម្មអាម៉េរិក ។
មន្ត្រីរដ្ឋាភិបាលអាម៉េរិកម្នាក់ កាលពីថ្ងៃពុធ បានបញ្ជាក់ថា ក្រុមហ៊ុន Amazon បានផ្ញើលិខិតមួយទៅកាន់អនុប្រធានាធិបតី ជេឌី វ៉ាន់ (JD Vance) និងមន្ត្រីក្រសួងពាណិជ្ជកម្ម លោក ហូវ៉ដ ឡាត់នីក (Howard Lutnick)។
ពាក់ព័ន្ធនឹងដំណឹងនេះ ក្រុមហ៊ុន Amazon មិនទាន់បានចេញមុខធ្វើការអត្ថាធិប្បាយជាសាធារណៈណាមួយនៅឡើយទេលើបញ្ហារបស់ Tiktok ស្របពេលក្រុមហ៊ុនបៃដាន (ByteDance) មិនទាន់បានឆ្លើយតបណាមួយដូចគ្នាទៅនឹងសំណើសុំការអត្ថាធិប្បាយពីអ្នកសារព័ត៌មាន ។
គួររម្លឹកថា ជាយូរណាស់មកហើយ ក្រុមហ៊ុន Amazon មានមហិច្ចតាក្នុងការរួមបញ្ចូលជាមួយប្រព័ន្ធផ្សព្វផ្សាយសង្គម ដែលអាចជួយជំរុញដល់ការលក់របស់ខ្លួន។ តាំងពីឆ្នាំ ២០១៣ និង ២០១៤ មក ក្រុមហ៊ុនបានដំណើរការកម្មវិធី Inspire ដែលស្រដៀងនឹង TikTok ផងដែរ តែក្រោយមក ក៏បានបិទទៅវិញនៅដើមឆ្នាំនេះ ៕
Nº.0588
