កងទ័ព អ៊ីស្រាអែល បើកការវាយប្រហារ នៅ ត្រង់ ភា គ ខាងត្បូង និង កណ្តាលតំបន់ហ្កាហ្សា
ចេញផ្សាយនៅថ្ងៃទី២១ ខែមីនា ឆ្នាំ២០២៥៖
ថ្ងៃព្រហស្បតិ៍ ទី២០មីនា នៅតំបន់ហ្កាហ្សា ពលរដ្ឋប៉ាឡេស្ទីនស្លាប់យ៉ាងហោច ៧០ នាក់បន្ថែមទៀតព្រោះតែការវាយប្រហាររបស់អ៊ីស្រាអែល។ ដោយសំអាងហេតុផលថា ពួកប្រដាប់អាវុធហាម៉ាសមិនព្រមដោះលែងចំណាប់ខ្មាំង កងទ័ពអ៊ីស្រាអែលបានសម្រុកវាយប្រហារទ្រង់ទ្រាយធំនាប៉ុន្មានថ្ងៃជាប់ៗគ្នា ដែលបណ្តាលឲ្យមនុស្សស្លាប់ជាច្រើនរយនាក់។ បើតាមអាជ្ញាធរសុខាភិបាលហាម៉ាស ការវាយប្រហាររបស់អ៊ីស្រាអែល ត្រឹមតែ៣ថ្ងៃចុងក្រោយនេះ បានបណ្តាលឲ្យពលរដ្ឋប៉ាឡេស្ទីនស្លាប់ យ៉ាងតិច ៥១០ នាក់។
កងទ័ពអ៊ីស្រាអែលបើកការវាយប្រហារនៅត្រង់ភាគខាងត្បូងនិងកណ្តាលតំបន់ហ្កាហ្សា ដែលបង្កវិនាសកម្មជីវិតមនុស្សនិងហេដ្ឋារចនាសម្ព័ន្ធជាច្រើន។ រដ្ឋមន្ត្រីការពារជាតិអ៊ីស្រាអែល លោក អ៊ីស្រាអែល ខាត្ស៍ បានព្រមានជាស្រេចថា ប្រសិនបើពួកប្រដាប់អាវុធហាម៉ាសមិនព្រមដោះលែងចំណាប់ខ្មាំង ហើយប្រសិនបើពួកហាម៉ាសមិនព្រមចាកចេញពីតំបន់ហ្កាហ្សានោះទេ អ៊ីស្រាអែលនឹងចាត់វិធានការឲ្យកាន់តែធ្ងន់ធ្ងរជាងនេះ ទៅទៀត។
ដោយមានជំនួយគាំទ្រយ៉ាងពេញទំហឹងទាំងស្មារតីនិងសម្ភារៈពីសំណាក់សហរដ្ឋអាមេរិក នាយករដ្ឋមន្ត្រីអ៊ីស្រាអែល លោក បេនចាមិន នេតាន់យ៉ាហ៊ូ បានប្រសិទ្ធនាមយុទ្ធនាការយោធារបស់ខ្លួន ថា«បើកច្រកទ្វារនរក» ដែលជាចំណាត់ការកណ្តាប់ដៃដែកដ៏សំខាន់ចាំបាច់ដើម្បីកម្ចាត់ពួកប្រដាប់អាវុធហាម៉ាស និងដើម្បីរំដោះចំណាប់ខ្មាំង។
ចំណាប់ខ្មាំងដែលត្រូវពួកហាម៉ាសចាប់ខ្លួននៅថ្ងៃទី៧ ខែតុលា ឆ្នាំ២០២៣ មានចំនួនជាង២៥០នាក់។ ក៏ប៉ុន្តែ ក្រោយដោះដូរចំណាប់ខ្មាំងជាច្រើនលើក ពេលនេះចំណាប់ខ្មាំងនៅសល់ក្នុងដៃហាម៉ាស ចំនួនតែ ៥៨ នាក់ប៉ុណ្ណោះ ហើយក្នុងចំណោមនោះ ទ័ពអ៊ីស្រាអែលប្រកាសថា ចំណាប់ខ្មាំងស្លាប់ ៣៤ នាក់ទៅហើយ។ តែអ៊ីស្រាអែលអះអាងថាខ្លួនមានកាតព្វកិច្ចត្រូវតែនាំយកចំណាប់ខ្មាំងទាំងអស់ឲ្យត្រឡប់មកវិញ ទាំងអ្នកនៅមានជីវិត និងទាំងសាកសព។
ទោះបីជាយ៉ាងណាក្តី នៅអ៊ីស្រាអែល មានបាតុកររាប់ពាន់នាក់បានជួបជុំគ្នា ដើម្បីតវ៉ាប្រឆាំងនឹងលោក បេនចាមិន នេតាន់យ៉ាហ៊ូ និងចោទប្រកាន់ថា នាយករដ្ឋមន្ត្រីរូបនេះ បន្តធ្វើសង្គ្រាម រំដោះចំណាប់ខ្មាំង គ្រាន់តែជាលេសតែប៉ុណ្ណោះ តែធាតុពិត គឺដើម្បីបន្តក្រាញអំណាចរបស់ខ្លួនឯង។ នេះបើតាមបាតុករអ៊ីស្រាអែល ដែលបានទាមទារឲ្យលោក បេនចាមិន នេតាន់យ៉ាហ៊ូ ចុះចេញពីតំណែងប្រមុខរដ្ឋាភិបាលអ៊ីស្រាអែល។
អ៊ីស្រាអែលនិងហាម៉ាស មានជំហរខ្វែងគ្នាចំពោះបទឈប់បាញ់ ដំណាក់កាលទី២ ដែលត្រូវចូលជាធរមាន នៅថ្ងៃទី១៩មីនា។ ចំពោះក្រុមប្រដាប់អាវុធហាម៉ាស មុននឹងពួកគេដោះលែងចំណាប់ខ្មាំងទាំងអស់ ទាល់តែអ៊ីស្រាអែលធានាថាទប់បាញ់ទាំងស្រុង ព្រមទាំងដកទ័ពអ៊ីស្រាអែលឲ្យអស់ ចេញពីទឹកដីហ្កាហ្សា ហើយបើកច្រកផ្លូវជំនួយមនុស្សធម៌ឡើងវិញ។ ក៏ប៉ុន្តែ អ៊ីស្រាអែលមិនត្រឹមតែបិទផ្លូវជំនួយមនុស្សធម៌ និងមិនដកទ័ពទេ ហើយថែមទាំងសម្រុកវាយប្រហារយ៉ាងរន្ថើន ដោយបង្ខំឲ្យពួកហាម៉ាសដោះលែងចំណាប់ខ្មាំងឲ្យអស់ ជាមុនសិន។ មិនតែប៉ុណ្ណោះ អ៊ីស្រាអែលដែលចាត់ទុកពួកហាម៉ាសជាប្រភពនៃការគំរាមកំហែង បានទាមទារឲ្យពួកហាម៉ាសត្រូវខ្លួនទាំងស្រុង ចេញពីតំបន់ហ្កាហ្សា។
គួរជ្រាបដែរថា ការវាយប្រហារបំផ្ទុះគ្រាប់នៅហ្កាហ្សា កាលពីថ្ងៃពុធ ទី១៩មីនា បានបណ្តាលឲ្យបុគ្គលិករបស់អង្គការសហប្រជាជាតិ ស្លាប់ម្នាក់ជាជនជាតិប៊ុលហ្ការី ហើយ ៥ នាក់រងរបួស។ ក្នុងចំណោមអ្នករងរបួសទាំងនោះ ក៏មានជនជាតិអង់គ្លេសដែរ។ ភ្លាមៗ អង្គការសហប្រជាជាតិ និងរដ្ឋាភិបាលអង់គ្លេស បានថ្កោលទោសអំពើហិង្សាបង្ហូរឈាមនៅហ្កាហ្សា និងទាមទារឲ្យបើកការស៊ើបអង្កេតឯករាជ្យ ជុំវិញគ្រោះថ្នាក់ស្លាប់និងរបួសមន្ត្រីមនុស្សធម៌របស់អង្គការសហប្រជាជាតិ៕
Nº.0557
