សមត្ថកិច្ចថា កម្លាំងជំនាញកំពុងតាមរកអត្តសញ្ញាណជនសង្ស័យ ដែលចាប់ជំរិតទារប្រាក់ជនជាតិចិន

សមត្ថកិច្ចថា កម្លាំងជំនាញកំពុងតាមរកអត្តសញ្ញាណជនសង្ស័យ ដែលចាប់ជំរិតទារប្រាក់ជនជាតិចិន

ចេញផ្សាយថ្ងៃទី០៦ ខែមីនា ឆ្នាំ២០២៥៖

អធិការស្រុកកណ្តាលស្ទឹងខេត្តកណ្តាលបានបញ្ជាក់នៅថ្ងៃទី៥ ខែមីនា ឆ្នាំ២០២៥ ថា កម្លាំងជំនាញនៅតែបន្តស្រាវជ្រាវរកអត្តសញ្ញាណជនសង្ស័យ និងម្ចាស់រថយន្ត Prius ពណ៌ក្រហមដែលពាក់ព័ន្ធនឹងករណីចាប់ជំរិតទារលុយជនជាតិចិន។  អធិការស្រុកកណ្តាលស្រុកកណ្តាលស្ទឹង លោកវរសេនីយ៍ឯក ឡេង សុខរុនបានប្តេជ្ញាតាមរកជនសង្ស័យឱ្យបានឆាប់ ខណៈដែលជនរងគ្រោះកំពុងសម្រាកព្យាបាលរបួសនៅមន្ទីរពេទ្យ។

លោកវរសេនីយ៍ឯក ឡេង សុខរុន អធិការនគរបាលស្រុកកណ្តាលស្ទឹងបានបញ្ជាក់នៅព្រឹកថ្ងៃទី៥ ខែមីនាថា ក្រោយកើតហេតុ និងមកទល់ពេលនេះ សមត្ថកិច្ចនៅតែបន្តតាមរកជនសង្ស័យទាំង ៤នាក់ដែលបានចាប់ជំរិតទារប្រាក់ពីជនជាតិចិន។ តាមលោកអធិការស្រុក កម្លាំងជំនាញប្រមូលបានភស្តុតាងគ្រប់គ្រាន់រួចរាល់ និងកំពុងតាមស្វែងរកអត្តសញ្ញាណជនសង្ស័យយ៉ាងមមាញឹក។ គួរជម្រាបថា កាលពីថ្ងៃទី៣ ខែមីនា មានអ្នកលេងបណ្តាញសង្គមជាច្រើនបានចែកចាយវីដេអូមួយដោយបង្ហាញឱ្យឃើញជនជាតិចិនម្នាក់បានព្យាយាមលោតចេញពីរថយន្តម៉ាកព្រុស(Prius)ពណ៍ក្រហមដែលកំពុងបើកបរលើផ្លូវក្រវ៉ាត់ក្រុងទី៣។

ក្រោយបានព័ត៌មានខាងលើ ស្នងការនគរបាលខេត្តកណ្តាលបានស្រាវជ្រាវ និងបានកំណត់ថា នេះជាករណីចាប់ជំរិតទារប្រាក់ពីជនជាតិចិន។ ស្នងការនគរបាលខេត្តកណ្តាលបានឱ្យដឹងនៅក្នុងសេចក្តីប្រកាសព័ត៌មានថា ជនរងគ្រោះមានឈ្មោះ Liu Sen ជនជាតិចិនរស់នៅប្រទេសអូស្ត្រាលី និងថា ដំណើរមកកម្ពុជានាពេលនេះ គឺ Liu Sen បានធ្លាក់ក្នុងល្បិចលួងលោមរបស់មិត្តភក្តិខ្លួនឈ្មោះ Wang Jainwei ថាមករកស៊ីជាមួយមនុស្សម្នាក់ទៀតឈ្មោះ Feng Zhiye ជាជនជាតិចិនរស់នៅកម្ពុជា ដោយសន្យាផ្តល់ភាគលាភប្រចាំខែក្នុងមុខតំណែងជាតំណាងក្រុមហ៊ុន។

កំណត់ហេតុរបស់ស្នងការខេត្តកណ្តាលបានរៀបរាប់ទៀតថា ក្រោយជនរងគ្រោះមកដល់កម្ពុជា បុគ្គលឈ្មោះ Feng Zhiye បានរៀបចំឡានមួយគ្រឿងម៉ាកព្រុស (Prius) ពណ៌ក្រហមដែលមានអ្នកបើកបរជាជនជាតិខ្មែរ តែមិនស្គាល់អត្តសញ្ញាណ។ ឡាននោះបានដឹកជនរងគ្រោះចេញពីព្រលានយន្តហោះអន្តរជាតិភ្នំពេញទៅជួបជាមួយមិត្តភក្តិរបស់ Feng Zhiye ម្នាក់ផ្សេងទៀត។ តែនៅពេលធ្វើដំណើរមកដល់ចំណុចផ្លូវក្រវ៉ាត់ក្រុងទី៣ ក្បែរស្ពានអាកាសជាតិលេខ២ ក្នុងស្រុកកណ្តាលស្ទឹង ឡាននោះក៏ឈប់ដើម្បីទទួលបុរសជនជាតិខ្មែរ៣នាក់ទៀត។ បន្ទាប់នៅក្នុងឡាន ពួកគេក៏បានចាប់ដៃ សង្កត់ទ្រូង និងច្របាច់កជនរងគ្រោះតែម្តង។

តាមចម្លើយសារភាពរបស់ជនរងគ្រោះ រូបគេបានព្យាយាមរើបម្រាសដោយបានចុចបើកកញ្ចក់រថយន្តចុះដើម្បីលោតចុះពីឡាន រួចហើយក៏រត់ទៅឱ្យពលរដ្ឋជួយ។ លោកអធិការស្រុកកណ្តាលស្ទឹងនៅពុំទាន់អាចបញ្ជាក់បាននៅឡើយទេថា តើជនសង្ស័យបានជំរិតទារប្រាក់ពីជនរងគ្រោះប៉ុន្មាន ដ្បិតបច្ចុប្បន្ន ជនរងគ្រោះកំពុងសម្រាកព្យាបាលរបួសនៅមន្ទីរពេទ្យ។ តែបើតាមស្នងការនគរបាលខេត្តកណ្តាល ជនរងគ្រោះបានបាត់វ៉ាលីដាក់ខោអាវចំនួន១ និងបាត់ទូរស័ព្ទចំនួន ១គ្រឿង ខណៈដែលវត្ថុតាងរបស់ជនសង្ស័យនៅមិនទាន់ត្រូវបានសមត្ថកិច្ចយកបានឡើយ៕

Nº.0489