ភ្លើងឆេះព្រៃនៅកូរ៉េខាងត្បូង៖ សម្លាប់មនុស្សជាច្រើននាក់ និងបានដុតបំផ្លាញព្រៃអស់ ប្រមាណ៤ម៉ឺន៨ពាន់ ហិកតា

ភ្លើងឆេះព្រៃនៅកូរ៉េខាងត្បូង៖ សម្លាប់មនុស្សជាច្រើននាក់  និងបានដុតបំផ្លាញព្រៃអស់ ប្រមាណ៤ម៉ឺន៨ពាន់ ហិកតា

ចេញផ្សាយនៅថ្ងៃទី៣១ ខែមីនា ឆ្នាំ២០២៥៖

គិតមកត្រឹមថ្ងៃអាទិត្យ ទី៣០ មីនា ភ្លើងឆេះព្រៃនៅភាគអាគ្នេយ៍ប្រទេសកូរ៉េខាងត្បូង ដែលបានចាប់ ឆាបឆេះកាលពីថ្ងៃសៅរ៍ ទី២២ មីនា បានសម្លាប់មនុស្សអស់ប្រមាណ ៣០នាក់ និង ដុតបំផ្លាញផ្ទះសម្បែងជាច្រើនសិបខ្នង រួមទាំងសំណង់បុរាណមួយចំនួន។ អាជ្ញាធរមូលដ្ឋានបានបើកការស៊ើបអង្កេតជាបឋម និងសង្ស័យលើបុរសជនជាតិកូរ៉េមានវ័យចំណាស់ម្នាក់ ថាជាអ្នកបង្កគ្រោះមហន្តរាយនេះ។

នៅកូរ៉េខាងត្បូង អណ្តាតភ្លើងខ្មួលខ្មាញ់ដែលបន្តឆាបឆេះតាំងពីថៃ្ងសៅរ៍ ទី២២ មីនា បានលេបត្របាក់ផ្ទះសម្បែងរាប់សិបខ្នង និងបានដុតបំផ្លាញព្រៃអស់ ប្រមាណ ៤ម៉ឺន៨ពាន់ ហិកតា ព្រមទាំងសំណង់បុរាណជាច្រើនកន្លែង ក្នុងនោះមានប្រាសាទបុរាណមួយដែលកសាងនៅសតវត្សទី៧នៃគ្រិស្តសករាជ។ គិតមកទល់ពេលនេះ ចំនួនមនុស្សស្លាប់បានកើនឡើងដល់ ៣០នាក់។ នេះបើយោងតាមការបញ្ជាក់របស់ក្រសួងមហាផ្ទៃកូរ៉េខាងត្បូង។

ប៉ូលិសបានបើកការស៊ើបអង្កេតជាបឋម និងបានសង្ស័យលើបុរសជនជាតិកូរ៉េខាងត្បូងម្នាក់ អាយុ ៥៦ឆ្នាំ ថាជាបង្កភ្លើងឆេះព្រៃនេះ ពីព្រោះភ្លើងបានឆាបឆេះចេញពីផ្នូរដូនតារបស់គាត់ ដែលស្ថិតភាគអាគ្នេយ៍នៃប្រទេសកូរ៉េខាងត្បូង។ បើយោងតាមសារព័ត៌មានក្នុងស្រុក កូនស្រីរបស់ជនសង្ស័យរូបនេះបានប្រាប់ក្រុមអ្នកស៊ើបអង្កេតថា ឳពុករបស់គាត់បានដុតមែកឈើធ្លាក់នៅផ្នូរដូនតា ទើបភ្លើងអាច រាលដាលដល់ព្រៃនៅក្បែរនោះ។ កាលពីថ្ងៃសៅរ៍ម្សិលមិញ ប៉ូលិសបានសាកសួរជនសង្ស័យរូបនេះពីមូលហេតុដែលបណ្តាលឲ្យភ្លើងឆេះព្រៃ។ អាជ្ញាមូលដ្ឋានបានបញ្ជាក់ថា ការស៊ើបអង្កេតនេះអាចនឹងត្រូវចំណាយពេលជាងមួយខែ ហើយប៉ូលិសនឹងកោះហៅជនសង្ស័យរូបនេះមកសាកសួរម្តងទៀត។

ចំណែកឯអ្នកជំនាញឧតុនិយម ការកើនឡើងកំដៅផែនដី ធ្វើឲ្យសីតុណ្ហភាពនិងរលកកំដៅឡើងខ្លាំង និង បរិមាណទឹកភ្លៀងទាប ដែលអំណោយផលដល់ភ្លើងឆេះព្រៃ។ នៅកូរ៉េខាងត្បូង កម្រិតទឹកភ្លៀងឆ្នាំ២០២៥ ទាបខ្លាំងជាងឆ្នាំមុនៗ បណ្តាលឲ្យតំបន់ជួបគ្រោះស្ងួតហួតហែងខ្លាំង បូកផ្សំនឹង ខ្យល់បក់ខ្លាំង ទើបបង្កឲ្យភ្លើងឆេះរាលដាលលឿន។ បើយោងតាមក្រសួងមហាផ្ទៃកូរ៉េខាងត្បូង ភ្លើងឆេះនេះ ជាគ្រោះមហន្តរាយដ៏កំណាចមួយដែលមិនធ្លាប់កើតមាននៅក្នុងប្រទេសកូរ៉េខាងត្បូង៕

Nº.0580