មនុស្សស្លាប់ដោយគ្រោះរញ្ជួយដីនៅភូមា កើនឡើង ដល់ ១៥០នាក់ និង របួសយ៉ាងតិច៧៣២នាក់ ទាំងនៅបាងកក និងភូមា

មនុស្សស្លាប់ដោយគ្រោះរញ្ជួយដីនៅភូមា កើនឡើង ដល់ ១៥០នាក់ និង របួសយ៉ាងតិច៧៣២នាក់ ទាំងនៅបាងកក និងភូមា

ចេញផ្សាយនៅថ្ងៃទី២៩ ខែមីនា ឆ្នាំ២០២៥៖

ចំនួន មនុស្ស ស្លាប់ ដោយសារគ្រោះរញ្ជួយដី នៅភូមា បានកើនឡើង ដល់ ១៥០នាក់ និង របួស យ៉ាងតិច ៧៣២នាក់ ទាំង នៅប្រទេស ភូមា និង ប្រទេសថៃ។ ថ្លែងតាម កញ្ចក់ ទូរទស្សន៍រដ្ឋ កាលពី យប់ ថ្ងៃសុក្រ មេដឹកនាំ របបសឹក បានព្រមាន ថា ចំនួនមនុស្ស ស្លាប់ នៅភូមា នឹង អាចច្រើនជាង១៤៤នាក់ ដោយមើល ទៅលើ ស្ថានភាពសំណង់អគារផ្ទះសម្បែង ដែល បាក់រលំ ខូចខាត យ៉ាងធ្ងន់ធ្ងរ ដោយសារ កម្លាំងរញ្ជួយព្រះធរណី។ នៅទីក្រុង បាងកក ក្រុមជួយសង្រ្គោះបន្ទាន់នៅបន្តរុករក ទាំងយប់ ដើម្បីស្វែងរក មនុស្ស នៅ ក្រោម គំនរថ្មអគារ៣០ជាន់ដែលបាក់ដួលរលំដល់ ដី ដោយសារ កម្លាំង រញ្ជួយដីពីប្រទេស ភូមា។ អាជ្ញាធរ ថៃ ជឿថា មានមនុស្ស ជិត ១០០នាក់ ដែល អាច បាត់ខ្លួននៅក្រោមគំនរអគារបាក់បែក។ ឈាង បុប្ផា រាយការណ៍ព័ត៌មាននេះ៖

នៅទីក្រុង បាងកក ប្រតិបត្តិការស្វែងរកជនរងគ្រោះនៅក្រោម គំនរសំណង់អគារ ដែលបាក់រលំដោយសារ គ្រោះរញ្ជួយដី ពីភូមា នៅតែ បន្តទាំងយប់អាធា្រត្រ។ បន្ទាប់ពីរកឃើញ សាកសព មនុស្ស ៦នាក់ ក្រុមជួយសង្រ្គោះ ថៃ បានប្រើ ដ្រូន និង សត្វឆ្កែ ដើម្បី ស្វែងរកជនរងគ្រោះ ជិត ១០០នាក់ ផ្សេងទៀត កំពុងបាត់ខ្លួន ជាប់សង្កត់ក្រោម គំនរថ្ម។

ប៉ុន្តែ ក្តីសង្ឃឹម រកឃើញ ជនរងគ្រោះដែលអាច នៅមាន ជីវិត នៅក្រោម គំនរថ្ម បាក់បែក មាន តិចណាស់។ ក្រុមជួយសង្រ្គោះជួបបញ្ហា ប្រឈមពីរ នោះគឺគេ ត្រូវ កាយគំនរថ្មដែលមានកំពស់ មិនតិចជាង ២០ម៉ែត្រ និង បំណែកថ្មអគារដែល អាច ធ្លាក់បង្កគ្រោះថ្នាក់ដល់ពួកគេ គ្រប់ពេលវេលា។ យោងតាម អាជ្ញាធរ ថៃ អ្នកដែលបាត់ខ្លួននៅក្រោម អគារដែលបាក់ដួលស្រុត ដោយសារ ការរញ្ជួយដី ពីភូមា ភាគច្រើនជា កម្មករធ្វើការ នៅការដ្ឋាន សាងសង់អគារ។

នៅក្រោយ ហេតុការណ៍ រញ្ជួយដែល បានបណ្តាល ឲ្យអគារខ្ពស់ៗក្នុងទីក្រុង បាងកក រងអង្រួន រេចុះឡើងជាច្រើនកន្លែង រដ្ឋបាល ក្រុងបាងកក បានសម្រេច ជម្លៀសមនុស្ស ចេញពីអគារ ខ្ពស់ៗ ចំនួន២កន្លែងនៅ យប់ ថ្ងៃ សុក្រ  និង សន្យា បញ្ជូន ក្រុមអធិការកិច្ច ស្ម័គ្រចិត្ត ១០០នាក់ ទៅ ត្រួតពិនិត្យ សុវត្ថិភាព នៅតាមអគារ ជាង ២០០០ផ្សេងទៀត នៅក្នុងទីក្រុង បាងកក។

នៅភូមា ជាពិសេស នៅ ក្បែរ រដ្ឋធានីបុរាណ ម៉ង់ដាឡេដែលជា ចំណុចរញ្ជួយដី កាលពីថ្ងៃ សុក្រ ការខូចខាត ហេដ្ឋារចនាសម្ព័ន្ធ និងការបាត់បង់ជីវិតមនុស្ស មានលក្ខណៈធ្ងន់ធ្ងរជាង ប្រទេស ថៃ។

ថ្លែងតាម កញ្ចក់ ទូរទស្សន៍ជាតិ ភូមានៅយប់ ថ្ងៃ សុក្រ មេដឹកនាំ របបសឹក លោកមីន អ៊ុងឡាំង បាន និយាយ ថា មនុស្ស ១៤៤នាក់ ស្លាប់ ចំណែក ៧៣២នាក់ រងរបួស។ មេដឹកនាំ យោធា ភូមានៅបាន ព្រមានថា ចំនួន មនុស្ស ស្លាប់អាច កើនឡើង ច្រើនជាងនេះ ព្រោះថា នៅមានមនុស្សច្រើនទៀត ដែលកំពុង បាត់ខ្លួននៅឡើយ។ ទីភ្នាក់ងារ អាមេរិក US Geological Surveyបាន វាយតម្លៃថា មនុស្ស ប្រមាណ ៨សែននាក់ រស់នៅ ក្នុងតំបន់ ដែលមានកម្រិតរញ្ជួយខ្លាំង។ ដូច្នេះ ចំនួន មនុស្ស ស្លាប់ អាច ដល់ ១ពាន់នាក់ ឬ ច្រើនជាងនេះ។ បើតាម ទីភ្នាក់ងារ អាមេរិកដដែល ភូមា ត្រូវ ប្រឈមនឹង បញ្ហា ធ្ងន់ធ្ងរមួយទៀត ដែលរមែង កើតឡើង នៅក្រោយគ្រោះរញ្ជួយដី នោះ គឺ ការបាក់រលំដី ឬដីធូររាវដែលអាច ធ្វើ ឲ្យសំណង់អគារ បាក់ដួលរលំដោយស្រួល។

នៅចំពោះមុខ គ្រោះមហន្តរាយ ធ្ងន់ធ្ងរ មេដឹកនាំយោធាភូមា ដែល ធ្វើរដ្ឋប្រហារ ទម្លាក់ រដ្ឋាភិបាល ស៊ីវិល របស់ លោកស្រី អ៊ុងសាន ស៊ូជី និងលង់ក្នុងសង្រ្គាម ស៊ីវិល ជាង ៤ឆ្នាំមកនេះ សុខចិត្តហារមាត់ សុំជំនួយពីសហគមន៍អន្តរជាតិ។ នៅថ្ងៃសុក្រ មេដឹកនាំរបបសឹក បាន ប្រកាស បើកទ្វារ ទទួលយកជំនួយបរទេស គ្រប់ច្រក។ បន្ទាប់ពីឥណ្ឌា អឺរ៉ុប ដែលប្រកាស ត្រៀមខ្លួនជួយ ប្រជាជន ភូមា អង្គការ សហប្រជាជាតិ បាន សម្រេច បញ្ចេញ កញ្ចប់ថវិកា ៥លាន ដុល្លារ សម្រាប់ផ្តល់ជំនួយ សង្រ្គោះបឋម ដល់ ប្រជាជន ភូមា។ ចំពោះ អគ្គលេខាធិការអង្គការសហប្រជាជាតិ គ្រោះរញ្ជួយដីជាទុក្ខជាន់លើទុក្ខ ព្រោះថា ប្រជាជនភូមា ប្រមាណ ២០លាននាក់ កំពុងជួបការ ខ្វះខាតរួចទៅហើយដោយសារ សង្រ្គាមស៊ីវិល ដែលបានធ្វើ ឲ្យមនុស្ស ជាង ៣លាន ៥សែននាក់ រត់ភៀសខ្លួន។ ប្រធានាធិបតីអាមេរិក នៅថ្ងៃសុក្រ អះអាងថា លោកបានយល់ព្រម ផ្តល់ ជំនួយ ដល់ភូមា ដែលកំពុងជួបគ្រោះអាសន្ន។ សំណួរ ចោទសួរថា តើ អាមេរិក នឹង ជួយ ភូមា តាម វិធីណា ព្រោះថា ទីភ្នាក់ងារ អាមេរិកUSAIDដែល ទទួលបន្ទុកខាងផ្តល់ជំនួយ បរទេស នៅក្នុង ករណីមានគ្រោះមហន្តរាយធម្មជាតិ ត្រូវ លោកដូណាល់ ត្រាំ ចោទថា ចាយលុយខ្ជះខ្ជាយ និង បញ្ជាឲ្យបិទទ្វារ។ នៅ សប្តាហ៍នេះ ក្រសួងការបរទេស ដោយ មានការចង្អុរបង្ហាញពី មហាសេដ្ឋីអេឡុន ម៉ាស្ក៍សម្រេច បណ្តេញ បុគ្គលិក ចុងក្រោយ របស់ USAID យ៉ាងយូរបំផុតនៅ ខែ កញ្ញាឆ្នាំនេះ៕

Nº.0575