អ៊ុយក្រែននៅតែ បន្តប្តេជ្ញាសហការជាមួយអាមេរិក ទោះបី អាមេរិក ផ្អាកឈប់ផ្តល់ជំនួយយោធា
ចេញផ្សាយថ្ងៃទី០៥ ខែមីនា ឆ្នាំ២០២៥៖
អ៊ុយក្រែន នឹងខិត ខំ ប្រឹងអត់ធ្មត់ បន្តចរចាជាមួយភាគីអាមេរិក ។ នេះគឺជាសម្តីអះអាងរបស់ លោក នាយករដ្ឋមន្ត្រីអ៊ុយក្រែន ភ្លាម ៗ បន្ទាប់ពីរដ្ឋបាល របស់ លោក ដូណាល់ ត្រាំ បាន ប្រកាស ផ្អាក លែង ផ្តល់ជំនួយ យោធា មកឲ្យ អ៊ុយក្រែន ចាប់ពីថ្ងៃទី ៤មីនា ។ ភាគី អ៊ុយក្រែន អះអាងថា នៅតែ បន្តសហការ ជាមួយ សហរដ្ឋអាមេរិក ហើយត្រៀមខ្លួនចុះហត្ថលេខា លើគម្រោង កិច្ចព្រមព្រៀង ធនធានរ៉ែ អ៊ុយក្រែន ។
នៅថ្ងៃទី ៤មីនា ភ្លាមៗបន្ទាប់ពីសេតវិមាន ប្រកាសផ្អាក ឈប់ផ្តល់ ជំនួយយោធាឲ្យអ៊ុយក្រែន លោក នាយករដ្ឋមន្ត្រីអ៊ុយក្រែន Denys Chmygal បាន លើកឡើងថា អ៊ុយក្រែននឹង ប្តេជ្ញាតស៊ូអត់ធ្មត់នៅសមរភូមិដើម្បីការពារទឹកដី ។ លោកបាន អះអាងទៀតថា ទោះបីជាយ៉ាងណាក៏ដោយ ក៏អ៊ុយក្រែន ប្តេជ្ញាបន្តសហការជាមួយភាគីអាមេរិកដែរ ដើម្បី ទទួលបាននូវ ការធានាការ ពារសន្តិសុខ ព្រោះថាវាគឺជារឿងស្លាប់រស់របស់ប្រទេសជាតិអ៊ុយក្រែន ។
ដោយលើកឡើងថា អាមេរិកគឺជាដៃគូដ៏ធំនិងមិនអាចខ្វះបាន លោកនាយករដ្ឋមន្ត្រីអ៊ុយក្រែន បានលើកឡើងថា រដ្ឋាភិបាល លោក នៅតែត្រៀមខ្លួនជាប់ជានិច្ច ដើម្បីចុះហត្ថលេខា លើកិច្ចព្រមព្រៀងក្របខណ្ឌមួយ ជាមួយសហរដ្ឋអាមេរិក ស្តីអំពីការ ការវិនិយោគ លើ ធនធានរ៉ែរបស់អ៊ុយក្រែន ។
ដូចគ្នាដែរ លោក Mykhaïlo Podoliak ទីប្រឹក្សាសន្តិសុខជាតិអ៊ុយក្រែន បានបង្ហោះសារលើបណ្តាញសង្គមX ថា ជាការពិតណាស់ គឺ អ៊ុយ ក្រែនមិនបោះបង់ចោលការព្យាយាម ក្នុង ការចរចាជាមួយភាគីអាមេរិកឡើយ ជុំវិញសំណុំរឿងជំនួយយោធា។ ទន្ទឹមនឹងនេះ អ៊ុយក្រែនក៏កំពុងតែពិភាក្សាជាមួយ សម្ព័ន្ធមិត្តអឺរ៉ុបដែរ ដើម្បីរកដំណោះស្រាយ បន្ទាន់ បន្ទាប់ពី អាមេរិក សម្រេចព្យួរកម្មវិធីជំនួយ យោធាសម្រាប់អ៊ុយក្រែន ។
គួរបញ្ជាក់ថា នៅថ្ងៃព្រហស្បតិ៍ ទី ៦មីនាខាងមុខនេះ ប្រទេសសមាជិក សហភាពអឺរ៉ុបទាំង ២៧ នឹងបើកជំនួបកំពូលវិសាមញ្ញ ដើម្បីរកវិធីជួយអ៊ុយក្រែន និងការពារសន្តិសុខអឺរ៉ុប ព្រោះថាសហរដ្ឋអាមេរិកដឹកនាំដោយលោកដូណាល់ ត្រាំ ហាក់កំពុងតែចង់បោះបង់ចោលសម្ព័ន្ធមិត្ត ហើយ។
កាលពីថ្ងៃអង្គារទី ៤មីនា លោកស្រី អួរស៊ូឡា វ៉ុនឌែរ ឡេយែន ប្រធានគណៈកម្មការអឺរ៉ុប បានផ្ញើលិខិតមួយទៅកាន់គ្រប់ប្រទេសសមាជិក សហភាពអឺរ៉ុប ដោយលោកស្រី លើកឡើងថា អនាគត នៃប្រទេស អ៊ុយក្រែន ដែល សេរីនិងមានអធិបតេយ្យ និងអនាគតនៃ ទ្វីប អឺរ៉ុបដែល មាន សន្តិសុខនិងការរីកចម្រើន គឺកំពុង តែប្រឈម គ្រោះថ្នាក់ ធំណាស់ ! ក្នុងលិខិតនេះដែរ លោកស្រីប្រធានគណៈកម្មការអឺរ៉ុប បាន រៀបរាប់អំពីផែន ការ ៥ចំណុច គិតជាទឹកប្រាក់ចំណាយ ប្រមាណ ៨០០ពាន់លានអឺរ៉ូ ដើម្បីឈានទៅពង្រឹងសមត្ថភាពការពារ ជាតិរបស់អឺរ៉ុប។ តាមការគ្រោងទុក ជំនួបកំពូលនៅព្រុចស៊ែលថ្ងៃទី ៦មីនា គឺគេនឹងពិភាក្សាគ្នាអំពី សំណើនេះ ៕
Nº.0488
