អតីតមេបាតុករក្រុមអាវលឿង ដាក់ថ្ងៃឱសានវាទឱ្យរដ្ឋាភិបាលថៃលុបចោលMOUស្តីពីតំបន់ត្រួតស៊ីគ្នាជាមួយកម្ពុជា

 អតីតមេបាតុករក្រុមអាវលឿង ដាក់ថ្ងៃឱសានវាទឱ្យរដ្ឋាភិបាលថៃលុបចោលMOUស្តីពីតំបន់ត្រួតស៊ីគ្នាជាមួយកម្ពុជា

អតីតមេដឹកនាំក្រុមអាវលឿងថៃ លោក Sondhi Limthongkul នៅថ្ងៃទី០៩ ខែធ្នូ បានប្រកាសដាក់ឱសានវាទឱ្យរដ្ឋាភិបាលថៃត្រូវតែលុបចោលអនុស្សារណៈនៃការយោគយល់(MOU) ស្តីពីការអភិវឌ្ឍរួមគ្នា នៅតំបន់OCA កាលពីឆ្នាំ២០០១ រវាងកម្ពុជា និងថៃ។ យោងតាមការចុះផ្សាយរបស់សារព័ត៌មានថៃ Bangkok Post អតីតមេដឹកនាំបាតុករក្រុមអាវលឿងរូបនេះតម្រូវឱ្យរដ្ឋាភិបាលដែលដឹកនាំដោយគណបក្សភឿថៃ ត្រូវឆ្លើយតបនឹងសំណើទាមទារនេះក្នុងរយៈពេល១៥ថ្ងៃ។ បើមិនដូច្នេះទេ រដ្ឋាភិបាលរបស់លោកស្រីផេ ថងថាន ស៊ីណាវ៉ាត់នឹងអាចប្រឈមនឹងបាតុកម្មប្រឆាំងរបស់ក្រុមអាវលឿង ដូចឪពុកលោកស្រី។

លោក Sondhi Limthongkul ដែលគេស្គាល់ថា ជាអតីតមេដឹកនាំបាតុករក្រុមអាវលឿងថៃ ប្រឆាំងនឹងលោកថាក់ស៊ីន រហូតធ្វើឲ្យយោធាធ្វើរដ្ឋប្រហារទម្លាក់លោកថាក់ស៊ីននៅឆ្នាំ ២០០៦ បានចេញមុខព្រមានធ្វើបាតុកម្មសាជាថ្មី ប្រសិនបើរដ្ឋាភិបាលថៃដែលដឹកនាំដោយកូនស្រីរបស់លោកថាក់ស៊ីន គឺលោកស្រី ផេថងថាន ស៊ីណាវ៉ាត់មិនព្រមលុបចោលអនុស្សារណៈនៃការយោគយល់(MOU) ស្តីពីការអភិវឌ្ឍរួមគ្នានៅតំបន់OCA ឆ្នាំ២០០១ជាមួយកម្ពុជា។

យោងតាមខ្លឹមសារចុះផ្សាយដោយសារព័ត៌មានថៃ Bangkok Post នាថ្ងៃទី០៩ ខែធ្នូ អតីតមេដឹកនាំក្រុមអាវលឿងរូបនេះ ទាមទារឱ្យរដ្ឋាភិបាលថៃដាក់សំណើឱ្យតុលាការធម្មនុញ្ញថៃពិនិត្យ សម្រេចលុបចោល MOUឆ្នាំ២០០១ជាបន្ទាន់ ដោយលោកទុកពេលឲ្យចំនួន១៥ថ្ងៃ។ បើតាមលោក Sondhi Limthongkul ការលុបចោលMOUឆ្នាំ២០០១ជាមួយកម្ពុជា មិនត្រូវការចំណាយពេលយូរឡើយ ដ្បិតថា អនុស្សារណៈនៃការយោគយល់គ្នារវាងកម្ពុជា-ថៃស្តីពីការអភិវឌ្ឍរួមគ្នានៅតំបន់OCA ពុំបានទទួលការអនុម័តយល់ព្រមពីសភាថៃនោះទេ។

ពាក់ព័ន្ធនឹងរឿងនេះ វិទ្យុបារាំងអន្តរជាតិនៅពុំទាន់អាចសុំការឆ្លើយតបពីលោក កែវ រតនៈ រដ្ឋមន្ត្រីក្រសួងរ៉ែ និងថាមពលបាននៅឡើយទេ។ ចំណែក លោក ប៉ែន បូណា ប្រធានអង្គភាពអ្នកនាំពាក្យរាជរដ្ឋាភិបាលវិញបញ្ជាក់យ៉ាងខ្លីថា នេះជារឿងផ្ទៃក្នុងរបស់ថៃ និងថា កន្លងមករដ្ឋាភិបាលកម្ពុជាបានបញ្ជាក់ពីជំហរជុំវិញបញ្ហានេះរួចហើយ។

កាលពីថ្ងៃទី២១ ខែវិច្ឆិកា ឆ្នាំ២០២៤កន្លងទៅ លោកនាយករដ្ឋមន្ត្រី ហ៊ុន ម៉ាណែតបានថ្លែងថា រដ្ឋាភិបាលកម្ពុជាកំពុងតែខ្នះខ្នែងជំរុញឲ្យមានកិច្ចចរចាជាមួយរដ្ឋាភិបាលថៃ ដោយឈរលើគោលការណ៍ម៉ត់ចត់ ត្រឹមត្រូវ និងការទទួលខុសត្រូវចំពោះពលរដ្ឋខ្មែរលើបូរណភាពទឹកដី និងអធិបតេយ្យជាតិ។

គួរកត់សម្គាល់ថា មេដឹកនាំក្រុមអាវលឿងថៃប្រកាសដាក់ថ្ងៃឱសានវាទឱ្យរដ្ឋាភិបាលថៃ ដឹកនាំដោយលោកស្រី ផេថងថាន ស៊ីណាវ៉ាត់ លុបចោលMOUឆ្នាំ២០០១ជាមួយកម្ពុជា បន្ទាប់ពីក្រុមជាតិនិយមថៃចេះតែលើកនិយាយថា ការបន្តឱ្យMOUនេះមានជីវិតបន្តទៀតនោះ ប្រទេសថៃនឹងបាត់បង់ផលប្រយោជន៍មកឱ្យប្រទេសកម្ពុជា។ លោក Sondhi Limthongkulផ្ទាល់បាននិយាយថា MOUឆ្នាំ២០០១ បានអនុញ្ញាតឲ្យកម្ពុជាគូសខ្សែព្រំដែនទឹកចូលក្នុងដែនសមុទ្រថៃ។

លោក សេង វណ្ណលី អ្នកតាមដានភូមិសាស្ត្រនយោបាយតំបន់អាស៊ី-ប៉ាស៊ីហ្វិកមើលឃើញការជាប់គាំងនៅក្នុងការចរចាស្តីពីតំបន់ត្រួតស៊ីគ្នា ប្រសិនបើក្រុមជាតិនិយមថៃបន្តទាមទារឱ្យរដ្ឋាភិបាលថៃលុបចោលMOUឆ្នាំ ២០០១។ តាមលោក សេង វណ្ណលី ប្រសិនបើMOUនេះត្រូវសើរើឡើងវិញ នោះកម្ពុជានឹងខាតបង់ផលប្រយោជន៍ខ្លាំង បើធៀបនឹងផលប្រយោជន៍ដែលភាគីថៃត្រូវខាតបង់។

សូមជម្រាបថា អនុស្សរណៈនៃការយោគយល់ (MOU) ស្ដីពីការអភិវឌ្ឍរួមគ្នានៅតំបន់ OCAត្រូវបានចុះហត្ថលេខាកាលពីឆ្នាំ ២០០១ ដោយមេដឹកនាំថៃ និងកម្ពុជាក្នុងជំនាន់រដ្ឋាភិបាលថៃដឹកនាំដោយលោកថាក់ស៊ីន និងរដ្ឋាភិបាលកម្ពុជាដឹកនាំដោយលោក ហ៊ុន សែន។ អនុស្សរណៈនៃការយោគយល់ គឺធ្វើឡើងដើម្បីដោះស្រាយតំបន់ត្រួតស៊ីគ្នាក្នុងឈូងសមុទ្រថៃដែលមានទំហំ២៦ ០០០គីឡូម៉ែត្រការ៉េ៕

Nº0229