កិច្ចប្រជុំ ICAPP បញ្ចប់ដោយប្រតិភូទាំងអស់សរសើរកម្ពុជាថាជាប្រទេសគំរូសន្តិភាព និងការផ្សះផ្សា
មហាសន្និបាតអន្តរជាតិនៃបណ្តាគណបក្សនយោបាយនៅអាស៊ី បានបញ្ចប់ជាផ្លូវការនៅទីក្រុងភ្នំពេញ នៅព្រឹកថ្ងៃសៅរ៍ទី២៣វិច្ឆិកានេះ។ សេចក្តីថ្លែងការណ៍ចេញពីទីក្រុងភ្នំពេញ បានរំលេចនូវ១៥ចំណុច ស្តីអំពីការស្វែងរកសន្តិភាព និងការផ្សះផ្សានៃបញ្ហាក្នុងតំបន់ និងពិភពលោក។ អ្វីដែលគេកត់សម្គាល់នោះគឺ បណ្តាប្រតិភូជាគណបក្សនយោបាយ បានសរសើរកម្ពុជា ថាជាប្រទេសនៃគំរូសន្តិភាព និងការផ្សះផ្សា ក្រោយសង្រ្គាម។
សម្រាប់បណ្តាប្រតិភូជាអ្នកនយោបាយ កម្ពុជាជាគំរូនៃសន្តិភាព ការផ្សះផ្សា និងការធ្វើសមាហរណកម្ម ក្នុងរយៈពេល២ទសវត្សចុងក្រោយនៅក្រោមអំណាចរបស់ លោក ហ៊ុន សែន ប្រធានគណបក្សប្រជាជនកម្ពុជា និងជាប្រធានព្រឹទ្ធសភា។ នេះជាចំណុចទី៦នៃសេចក្តីថ្លែងការណ៍សន្តិភាពទីក្រុងភ្នំពេញ ដែលប្រតិភូចូលរួមមហាសន្និបាតអន្តរជាតិនៃបណ្តាគណបក្សនយោបាយនៅអាស៊ី (ICAPP) បានឯកភាពគ្នា។
សម្រាប់ ICAPP គំរូភាពរបស់កម្ពុជា នឹងសបញ្ជាក់ពីដំណោះស្រាយដ៏មានសក្តានុពលចំពោះការបញ្ចប់សង្រ្គាម និងកសាងសន្តិភាព ការផ្សះផ្សាជាតិ ដោយឈរលើគោលការណ៍បរិយាប័ន្ន ការអត់ឱន ការច្នៃប្រឌិត ភាពចម្រុះនៃវប្បធម៌ និងការតភ្ជាប់។
ការលើកឡើងរបស់ប្រតិភូជាគណបក្សនយោបាយ ធ្វើឡើងនៅក្នុងសេចក្តីថ្លែងការណ៍សន្តិភាពទីក្រុងភ្នំពេញ ក្រោមប្រធានបទ «ការស្វែងរកសន្តិភាព និងការផ្សះផ្សា» សម្រាប់កម្ពុជានិយាយជារួម និងនិយាយដាច់ដោយឡែកសម្រាប់គណបក្សប្រជាជនកម្ពុជា ធ្វើជាម្ចាស់ផ្ទះ។
ថ្លែងនៅក្នុងសន្និសីទព័ត៌មានបិទបញ្ចាប់កិច្ចប្រជុំ ICAPP លោក សួស យ៉ារ៉ា អនុប្រធានគណៈអចិន្ត្រៃយ៍ICAPP បានកត់សម្គាល់ពីជោគជ័យរបស់កម្ពុជាក្នុងនាមជាម្ចាស់ផ្ទះនៃកិច្ចប្រជុំលើកទី១២នេះ។ បើតាមមន្ត្រីជាន់ខ្ពស់នៃបក្សកាន់អំណាចរូបនេះ គណបក្សប្រជាជនកម្ពុជានឹងស្នើឲ្យមាននូវធម្មនុញ្ញសន្តិភាព សម្រាប់ជាការការពារជម្លោះ និងដោះស្រាយជម្លោះ ឬសង្រ្គាម ដោយឈរលើគោលការណ៍សន្តិភាព។
បើទោះបីជា មានការអះអាងពីជោគជ័យនៃការនាំយកសន្តិភាព និងការផ្សះផ្សាជាតិជូនកម្ពុជាក្តី ក៏ប៉ុន្តែពីជ្រុងគណបក្សក្រៅរដ្ឋាភិបាលមួយចំនួន យល់ឃើញថា សន្តិភាពកម្ពុជានៅមិនពេញលេញ និងកំពុងប្រឈមបញ្ហាបែកបាក់នយោបាយផ្ទៃក្នុង។
បើតាមក្រុមអ្នកនយោបាយក្រៅរដ្ឋាភិបាលមួយចំនួន បញ្ហានេះបានកើតឡើងនៅក្រោយដែលមានការរំលាយអតីតបក្សប្រឆាំងដ៏មានឥទ្ធិពល ហើយវប្បធម៌ស ន្ទនារវាងអ្នកនយោបាយចាស់ៗវស្សាក៏លែងកើតមានឡើង៕
N.0093
