រាជធានីភ្នំពេញ ៖ ដើម្បីពង្រឹងការគ្រប់គ្រងឲ្យមានប្រសិទ្ធភាព សម្តេចបវរធិបតីហ៊ុន ម៉ាណែតនាយករដ្ឋមន្ត្រីកម្ពុជា គូសបញ្ជាក់ដោយឯកភាពឲ្យមានការផ្លាស់ប្តូរថ្នាក់ដឹកនាំជាក្បាលម៉ាស៊ីននៅពន្ធនាគារព្រៃស(ម១)តែម្តង។
ការសម្រេចរបស់ប្រមុខរាជរដ្ឋាភិបាល បន្ទាប់ពីទទួលបានវីដេអូបែកធ្លាយចេញពីពន្ធនាគារមានពិធីជប់លៀង ហើយមានការចាក់បាស់ច្រៀងរាំយ៉ាងសប្បាយរបស់ទណ្ឌិតមួយក្រុមដែលកំពុងជាប់ក្នុងពន្ធនាគារ។
សម្តេចបវរធិបតីបានគូសបញ្ជាក់នៅក្នុង «ពិធីអបអរសាទរខួបអនុស្សាវរីយ៍៣០ឆ្នាំ ថ្ងៃបង្កើតកងពលតូចលេខ៧០» នៅថ្ងៃទី១៥ ខែតុលា ឆ្នាំ២០២៤ យ៉ាងដូច្នេះថា៖ «ខ្ញុំបានឃើញគេបង្ហោះតាមហ្វេសប៊ុកជប់លៀងពេញក្នុងគុក ។ រឿងនេះ ខ្ញុំបានជជែកជាមួយឯកឧត្តម ស សុខា ពីម្សិលម្ង៉ៃបានប្រគល់ភារកិច្ចឲ្យមើលពិនិត្យករណីនឹងឡើងវិញ ដោយត្រូវឆែក ស្រាវជ្រាវ មើលរឿង ហ្នឹងវាយ៉ាងម៉េច ?។
សម្តេចធិបតីបានគូសបញ្ជាក់ថា «ត្រូវធ្វើយ៉ាងណា ក្នុងនោះ ត្រូវធ្វើការកែទម្រង់ពន្ធនាគាររបស់យើងនៅទូទាំងប្រទេស ។ ហើយម្សិលមិញ ឯកឧត្តម ស សុខា បានរាយការណ៍មក ហើយខ្ញុំបានឯកភាពដោយធ្វើការផ្លាស់ប្តូរក្បាលម៉ាស៊ីនដឹកនាំនៅពន្ធនាគារព្រៃស(ម១)តែម្តង ដើម្បីពង្រឹងស្ថាប័ននេះ»។
សម្តេចបវរធីបតីនាយករដ្ឋមន្ត្រីបានលើកឡើងទៀតថា÷ ការធ្វើការផ្លាស់ប្តូរនេះ ត្រូវត្រៀមអ្នកជំនួស និងធ្វើយ៉ាងណាត្រៀមក្នុងការពង្រឹងសន្តិសុខ ។ ព្រោះគ្រប់ទិដ្ឋភាពទាំងអស់ ត្រូវតែធ្វើ ដូច្នេះរឿងសន្តិសុខជាតិទាំងខាងក្រសួងមហាផ្ទៃទាំងក្រសួងការពារជាតិ បានដើរតួនាទីសំខាន់ ក្នុងការបំពេញភារកិច្ច៕
